د امربالمعروف، نهې عن المنکر اوشکایتونو اورېدلو وزارت اړوند د محتسبینو د ښوونې او روزنې ریاست له لوري محتسبینو ته روزنیز سمینار وړاندې شو
د امربالمعروف، نهې عن المنکر او شکایتونو اورېدلو وزارت اړوند د محتسبینو د ښوونې او روزنې ریاست له لوري د دې وزارت د غونډو په تالار کې د پلازمېنې کابل ښاري ریاست محتسبینو ته چی تعداد یې سلګونو تنو ته رسېده د ظرفیت لوړونې په موخه یو روزنیز سمینار وړاندې شو.
د امر بالمعروف، نهې عن المنکر او شکایتونو اورېدلو وزارت سرپرست وزیر شیخ محمد خالد الحنفي د سمینار په لړ کې محتسبینو ته وویل: زمونږ دنده خلکو ته د الهي احکامو په سم ډول رسول دي، تر څو په ټولنه کې معروفات قائم او د منکراتو مخه ونیول وشي.
ښاغلي حنفي صاحب زیاته کړه چې ټول محتسبین له خلکو سره په ښه چلند مکلف دي او خلک باید په احسنه طریقه د معروفاتو ترسره کولو ته دعوت کړي، څو د ولس په زړونو کې ځای پیدا کړي.
په ورته وخت کې د یاد وزارت د پالیسی او مسلکي معین شیخ محمد فقیر محمدي محتسبینو ته په خطاب کې وویل: موږ او تاسې باید په خپلو نېکو کړنو د ولس زړونه را خپل کړو او په داسې اخلاص، تقوای او صداقت دعوت وکړو، چې که یو وخت په ټولنه کې علماء نه وي هم، خو ستاسو د اخلاص او صداقت اثر پاتې وي، وګړي الهي احکام پلي او خپلې ورځنۍ کړنې د اسلامي احکامو پر اساس تر سره کړي.
وروسته د یاد وزارت د نظارت او ارزیابۍ رئیس مولوي فضل الربي په یاد سمینار کې هغه مطالب چې د محتسبینو د لا ښه فعاليتونو اړوند و، واورول او زیاته یې کړه، محتسبین شرعاً مکلف دي چې خپل ټول فعالیتونه د دې وزارت د قوانینو په چوکاټ کې او په احسن طریقه مخته یوسي.
د یادولو ده چې محتسبینو ته د ظرفیت لوړونې سمینارونه د کابل په ګډون په ټولو ولایتونو کې د یاد وزارت د ښوونې او روزنې ریاست لخوا په لار اچول کېږي چې په کې محتسبینو ته د دعوت اصول او له خلکو سره د نېک چلند کولو سپارښتنې او لارښوونې کېږي.
