په زابل او لغمان ولایتونو کې محتسبینو اووه مېرمنې له خپلو شرعي حقونو برخمنې کړې
د امر بالمعروف، نهی عن المنکر او شکایتونو اورېدلو وزارت اړوند د زابل و لغمان ولایتونو محتسبینو د مېرمنو حقونو ته په ژمنتیا او په دې برخه کې د لدو پېښو او ناوړه دودونو د مخنیوي په موخه اووه مېرمنې، چې د ناوړه دودونو له مخې له خپلو شرعي حقونو څخه بې برخې وې له خپلو شرعي حقونو څخه برخمنې کړې.
د یادو ولایتونو مسؤلین وایي، یادې مېرمنې چې د ناوړه دودونو او غیر شرعي کړنو په اساس له میراث، نفقې او ولور له حقونو څخه بې برخې وې او د کورنیو د غړو له لوري ور سره ناوړه چلند کېده د محتسبینو په هڅو له خپلو شرعي حقونو څخه برخمنې شوې.
د امر بالمعروف، نهی عن المنکر او شکایتونو اورېدلو وزارت مسؤلین ډاډ څرګندوي، چې په پوره توان به د مېرمنو هغو حقونو ته رسېدنه کوي چې په ټولنه کې مېرمنې د ناوړه دودونو او بې معنا غیرتونو له امله هغوی څخه بې برخې شوې دې او هېڅ چاته به اجازه ور نکړو چې د مېرمنو پر وړاندې له تاوتریخوالي ډک چلند څخه کار واخلي.
د یادولو وړ ده، چې د یاد وزارت محتسبینو د هېواد په کچه، د مېرمنو حقونو ته د رسېدنې په برخه کې زرګونه بېلا بېلو قضیو ته رسېدنه کړې، چې پکې د میراث، کورني تاوتریخوالي، ولور، په بدو کې ورکړې او غیر شرعي نکاح ګانو قضیې حل شوې دې.
