امربالمعروف، نهي عن المنکر او د شکایتونو اورېدلو وزارت په اونۍ کې
۱- د اصلاحي او عامه پوهاوي غونډو جوړول:
د امربالمعروف، نهی عن المنکر او شکایتونو اورېدلو وزارت محتسبینو او مبلغینو په دې اونۍ کې د معروفاتو اقامې، منکراتو مخنیوي، د عامه پوهاوي د کچې لوړولو په موخه، له دیني عالمانو، قومي مشرانو او د ټولنې له بېلابېلو قشرونو سره تر ۸۰۰ ډېرې اصلاحي او د پوهاوي غونډې کړې دي.
له بلې خوا، د دغه وزارت نظامي مسؤلینو او محتسبینو د پلازمېنې کابل په ګډون په ځینو ولایتونو کې له نظامي ارګانونو څخه د څارنې ترڅنګ، د وزارت د لارښوونو د پلي کولو او ګډې همغږۍ رامنځته کولو په موخه، له مسؤلینو او منسوبینو سره اصلاحي ناستې کړې دي.
همدارنګه، محتسبینو د بازارونو د چارو د تنظیم، د شرعي احکامو د تطبیق، د احتکار او ګرانپلورنې د مخنیوي او د پټاقیو او اور اخیستونکو توکو د پېر او پلور د مخنیوي په موخه، له سوداګرو او هټۍوالو سره نږدې ۳۰۰ اصلاحي کړې دي، چې د دغو فعالیتونو په پایله کې د ښارونو له بېلابېلو سیمو څخه د پټاقیو او اور اخیستونکو توکو سلګونه زره فیره راټول او له منځه وړل شوي دي.
دغه راز د یاد وزارت د اطلاعاتو او عامه اړیکو ریاست مسؤلینو د وزارت د لاسته راوړنو د خپرولو ترڅنګ، په رسنیو او ټولنیزو شبکو کې د لسګونو سرغړونو مخنیوی کړی او سرغړوونکو اشخاصو او مسؤلینو ته یې لازمې سپارښتنې کړې دي، څو د رسنیزو پروګرامونو او محتوا د خپرولو پر مهال د اسلامي شریعت احکام، دیني ارزښتونه او اخلاقي اصول رعایت کړي.
۲- د خلکو شکایتونو ته رسېدنه:
د شکایتونو اورېدلو معینیت منسوبینو د خلکو د ستونزو ته د رسېدنې په موخه، په دې اونۍ کې ۴۳۶ شکایتونه په حضوري ډول او د وړیا ټیلیفوني شمېرو له لارې ثبت کړي دي، چې له دې جملې څخه ۵۵ شکایتونه حل شوي دې او پاتې شکایتونه د اړینو اجراآتو په موخه اړوندو ارګانونو ته راجع شوي دې .
۳- د کوډګرو نیول:
محتسبینو د خرافاتو پر وړاندې د مبارزې او د اسلامي شریعت له احکامو او دیني ارزښتونو سره د مخالفو کړنو د مخنیوي په موخه په دې اونۍ کې په کابل، پروان، زابل، تخار، بغلان او خوست ولایتونو کې ۱۱ هغه کسان نیولي چې د جادو او خرافاتي کړنو په کولو بوخت وو، چې د شرعي پرېکړې په موخه یې عدلي او قضایي ارګانونو ته ور پېژندلي دې.
۴- د شخړو حل او دښمنیو پای ته رسول:
محتسبینو د دښمنیو د له منځه وړلو او د خلکو ترمنځ د یووالي او ورورولۍ روحیې د پیاوړتیا په موخه، په دې اونۍ کې د دیني عالمانو او قومي مشرانو په همکارۍ، په مرکز او ځینو لایتونو کې ۹ دښمنۍ او ۷۳ شخړې د اسلامي شریعت له احکامو سره سمې حل کړې دي.
۵- د ښځو شرعي حقونو ته رسېدنه:
د امربالمعروف، نهي عن المنکر او شکایتونو اورېدلو وزارت منسوبینو د ښځو د شرعي حقونو د تأمین په موخه د ښځو د شرعي حقونو اړوند ۹۶ قضیو ته رسېدنه کړې ده.
په دغو قضیو کې ظلم، اجباري نکاح، میراث ، مهر، نفقه، د شرعي نکاح د زمینې برابرول او طلاق شاملې دي.
