امر بالمعروف، نهی عن المنکر او شکایتونو اورېدلو وزارت په اونۍ کې
د امربالمعروف، نهی عن المنکر او شکایتونو اورېدلو وزیر شیخ الحدیث مولوي محمد خالد الحنفي ولایتونو ته د رسمي سفر په لړ کې د جنوبي ولایتونو له دیني عالمانو، مسؤلینو، متنفذینو او قومي مخورو سره، د یاد وزارت د قانون د تطبیق، ناوړه دودونو د مخنیوي او په دې برخه کې د همکارۍ په موخه ناستې وکړې.
د مېرمنو حقونو ته رسېدنه:
د امربالمعروف وزارت محتسبینو په دې اونۍ کې د مېرمنو د حقونو اړوند (۱۱۸) بېلابېلې قضیې حل کړې دي، چې له جملې یې (۶۰) د کورني تاوتریخوالي، (۸) د میراث، (۱۰) د غیر شرعي نکاح ګانو،(۱۱) د ولور، (۹) د نفقې ورکړې، (۸) مېرمنو ته د شرعي نکاح زمینه برابرولو او (۱۲) د طلاق قضیې حل شوې دي.
د قومي دښمنیو حل:
د دې وزارت مسؤولینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره په ځینو ولایتونو کې (۱۵) لویې دښمنۍ او (۵۳) وړې شخړې حل کړې دي.
د کوډګرو نیول:
دغه راز محتسبینو په د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه په بلخ،پغلان،پروان، تخار، ننګرهار،کابل او جوزجان ولایتونو کې (۱۳) کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دې.
له سوداګرو سره ناستې:
محتسبینو په بازارونو کې د سود، احتکار، ترازو کې د کموالي، د تاریخ تېر او بې کیفیته موادو د خرڅلاو د مخنیوي په موخه له سوداګرو او هټۍوالو سره (۲۰۰) اصلاحي ناستې کړې دې.
