د امر بالمعروف، نهې عن المنکر او شکایتونو اورېدلو وزارت له لوري د ټول افغانستان د ۳۴ ولایتونو په کچه د ۵۵۰ تنو د مبلغینو لپاره درې ورځنۍ اصلاحي او تربیتې غونډه پیل شوه.
یاده غونډه د لومړۍ ورځې لپاره د قران الکریم په مبارکو ایاتونو سره پیل شوه او موخه یې د مبلغینو د دعوتي او مسلکي ظرفیت د لوړولو، د مبلیغینو د نوي قانون چې دعالیقدر امیرالمؤمنین حفظه الله ورعاه له لوري توشیح شوی او تازه په رسمي جریده کې چاپ شوی دی، د مبلغينو د نوې نصاب او اړوندو اصولو د لا ښه تشریح او پوهاوي په موخه جوړه شوې ده، چې په ترڅ کې به یې ګډونوالو ته د شیوخو کرامو او مسولینو لخوا د یاد قانون د موضوعاتو، د دعوت د اصولو، د اصلاحي فعالیتونو او دعوتي چارو اړوند لازمې روزنې او لارښوونې وړاندی کړل شي.
ټاکل شوې ده چې دغه اصلاحي او تربیتې غونډه درې ورځې دوام وکړي او ګډونوال به د افغانستان په بېلابېلو ولایتونو کې د خپلو دعوتي او اصلاحي فعالیتونو د لا اغېزمنتیا لپاره له ترلاسه شویو زده کړو څخه ګټه واخلي.
۱۴۴۷/۱۲/۳۰ - ۱۴۰۳/۳/۲۵
د امربالمعروف نهی عن المنکر او شکایتونو اوریدلو وزارت
د اطلاعاتو او عامه اړیکو ریاست
