د هېواد په غزني، بلخ او هلمند ولایتونو کې پنځه مېرمنې له ناخوښه نکاح ګانو څخه وژغورل شوې
د امر بالمعروف، نهی عن المنکر او شکایتونو اورېدلو وزارت اړوند د هلمند، بلخ او غزني ولایتونو محتسبینو د خپلو کړنو پر مهال پنځه هغه مېرمنې چې د زیاتو پیسو او ناوړه دودونو له مخې په اجباري توګه په نکاح ورکول کېدلې وژغورلې.
په تړاو یې محتسبین وایي: یادې مېرمنې چې د کورنیو غړو یې غوښتل د هغوی له خوښتې پرته یې د زیاتو پیسو او ناوړه دودونو له امله په جبري توګه په نکاح کړي، چې د شرعي حق د ورکړې په موخه یادې مېرمنې له غیر شرعي نکاح ګانو څخه وژغورل شوې.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: (هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي).
دا په داسې حال کې ده، چې د امر بالمعروف، نهې عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو د حقونو اړوند نا خوښه ودونې، کورني بند خونو، کورني تاوتریخوالي، ولور او میراث سلګونه قضیې حل کړې دي او په دې پار یې کړنې لا هم دوام لري.
