ننګرهار کې د محتسبینو په هڅو درې نجونې د شرعي نکاح له حقوقو برخمنې شوې
د ننګرهار ولایت د امر بالمعروف، نهی عن المنکر او شکایتونو اورېدلو ریاست مسؤلینو په هڅو درې ځوانې نجونې، چې له تېرو (۶) کلونو راهیسې د نکاح له شرعي حقوقو څخه بې برخې وې او د یادو کورنیو تر منځ د را پورته شوي جنجال له امله ورته د شرعي نکاح کولو اجازه نه ورکول کېدله د محتسبینو په هڅو له خپل شرعي حق څخه برخمنې او د کورنیو تر منځ روغه وشوه.
په دې تړاو د یاد ولایت د امر بالمعروف مسؤلین وایي: یادې نجونې، چې د کورنیو غړو یې د یادو نجونو له خسرګنیو سره د رامنځته شوي جنجال له امله نوموړې نجونې له تېرو( ۶) کلونو راهیسې له خپلو ځانونو سره ساتلې وې او د شرعي نکاح حق یې ور څخه اخیستی و، د محتسبینو په هڅو له اوږد مهاله محرومیت څخه وژغورل شوې او له خپلو شرعي حقونو څخه برخمنې شوې.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: «هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي»
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
