خوست کې د امر بالمعروف وزارت د قانون د تنفیذ اونیزه ناسته وشوه
د خوست ولایت د امر بالمعروف ریاست مسؤلینو د دې ولایت د والي مولوي عبدالقیوم روحاني په مشرۍ د امر بالمعروف وزارت د قانون د تطبیق، ټولنیزو ستونزو د حل، اسلامي ارزښتونود پیاوړي کولو او په اړوندو برخو کې د قوانینو د عملي پلي کولو په موخه د امر بالمعروف وزارت د قانون تنفیذ اونیزه ناسته وشوه.
د ناستې ګډون والو د امر بالمعروف د قانون د تطبیق چاره اړینه وبلله او ټینګار یې وکړ، چې امارتي مسؤلین باید پخپلو چارو کې له عدل او انصاف څخه کار واخلي او خپلې کړنې دې د شریعت د لارښوونو په اساس تر سره کړي ، څو د اسلامي ارزښتونو د پیاوړتیا تر څنګ د خلکو ترمنځ د ورورولۍ او همغږۍ فضا نوره هم پیاوړې شي.
د کمېټې غړو د ټولو امارتي ادارو استازو ته په خطاب کې وویل، چې خپلو کارمندانو ته سپارښتنه وکړي څو د ذي روح شیانو تصویرونه له دفترونو او موټرو څخه لرې کړي او د امربالمعروف ریاست او علماوو شورا ته دنده وسپارل شوه، څو د مجسمو جوړوونکو کارخانو او د چاپ خونو مسؤلینو سره د اصلاح په موخه ځانګړې غونډې وکړي او هغوی د دې عمل له دوام څخه منع کړي.
د یادولو وړ ده، چې د قانون د تطبیق کمېټې څه موده وړاندې هم د یتیمانو او مظلومانو سره د ناوړه چلند مخنیوي، بدعتونو له منځه وړلو، د ډاکټرانو له لوري د نه لوستل کېدونکو نسخو نه لیکو او په ټولنه کې د ټولو ناوړه دودونو د مخنیوي په موخه ناسته کړې وه.
