کندهار کې محتسبینو ته څلور ورځنی روزنیز سیمینار پای ته ورسېد
د امربالمعروف، نهې عنالمنکر او شکایتونو اورېدلو وزارت د محتسبینو د ښوونې او روزنې ریاست له لوري د کندهار ولایت مرکز او ولسوالیو محتسبینو ته د امر بالمعروف او نهې عنالمنکر قانون د اورولو او په دعوتي برخه کې د وړتیا لوړونې په موخه څلور ورځنی روزنیز سمینار د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي، د لوړو زده کړو سرپرست وزیر شیخ ندا محمد نديم او ګڼ شمېر مسؤولینو او محتسبینو په شتون د یوې غونډې په ترڅ کې پای ته ورسېد.
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب محتسبینو ته په خطاب کې وویل: خپلو کړنو کې د الله تعالی رضا په پام کې ونیسئ او ټولنې ته د اسلام د مبارک دین غوره ترجماني وکړئ.
ښاغلي شیخ صاحب له محتسبینو وغوښتل ترڅو په خپلو چارو کې د زغم او حکمت څخه کار واخلي او د ټولنې لپاره بېلګه وګرځي.
یادې غونډې ته راغلو مسؤولینو امر بالمعروف او نهې عنالمنکر د اسلامي نظام ځانګړنه او د پایښت لامل وباله او ویې ویل: چې د اسلامي نظام او نورو نظامونو ترمنځ توپیر د امر بالمعروف او نهې عنالمنکر په شتون کې دی.
همداراز هغوی محتسبینو ته په خطاب کې وویل: چې ستاسې کار له ولس سره دی او ستاسې هره کړنه د اسلامي نظام استازولي کوي، نو په همدې اساس له خلکو سره نرم او غوره چلند کوئ، ستونزو ته یې پر وخت رسېدنه او په دې برخه کې د مشرانو بشپړ اطاعت وکړئ.
هېره دې نه وي چې د امربالمعروف، نهې عن المنکر او د شکایتونو اورېدلو وزارت اړوند د محتسبینو د ښوونې او روزنې ریاست د مسؤولینو له لوري د هېواد په ټولو ولایتونو کې د محتسبینو د وړتیا لوړونې او هغوی ته د نوي قانون د اورولو په موخه د اصلاحي او روزنیزو سمینارونو لړۍ دوام لري.
