د امربالمعروف، نهې عن المنکر او شکایتونو اورېدلو وزارت مسؤلینو له ترکيې هېواد څخه راغلي پلاوي سره وکتل
د امربالمعروف، نهې عن المنکر او شکایتونو اورېدلو وزارت مسؤلینو د ترکیې هېواد څخه راغلي څلور کسیز پلاوي سره ناسته کې د وزارت پر کړنو، د نړیوالو او د ترکي وګړو د شته شبهاتو د لرې کولو او په اړونده برخو کې د دوامدارې همکارۍ او اړیکو پر پیاوړتیا خبرې وکړې.
د یاد وزارت د اطلاعاتو او نشراتو رئیس، مفتي محمد انور معتصم بالله راغلي پلاوي ته د ښه راغلاست ترڅنګ د وزارت د کړنو، تګلارو او لاسته راوړنو په اړه بشپړ معلومات وړاندې کړل.
ښاغلي معتصم څرګنده کړه، امربالمعروف، نهې عن المنکر د اسلامي نظام اساسي برخه ده چې په ټولنه کې د معروفاتو اقامه او د منکراتو مخنیوی د خلکو غوښتنه ده چې د لارښوونو او توصیو له لارې به پلي کېږي.
هغه همداراز د تېرو درې کلونو لاسته راوړنې، په ځانګړې توګه د میرمنو د حقونو لکه د میراث حق، د اجباري نکاح مخنیوی او د کورني تاوتریخوالي مخنیوی په اړه معلومات ورکړل او زیاته یې کړه چې په ټولنه کې د معروفاتو اقامه او د منکراتو مخنیوی د اسلامي احکامو پر بنسټ ترسره کېږي.
بلخوا د ترکیې هېواد څخه راغلي پلاوي د امربالمعروف وزارت د کړنو د ستایلو ترڅنګ د دې وزارت د حقیقي انځور وړاندې کول او تر نړیوالو رسول خپل دیني مسؤولیت وباله چې په وینا یې، (په بهر هېوادونو کې د افغانستان انځور او داخلي انځور یې فرق لري؛ دلته خلک په امن کې ژوند تېروي او مسؤلین یې تر بل هر چا له وګړو سره غوره او مسلکي چلند کوي) او ډاډ یې ورکړ چې د یاد وزارت د لاسته راوړنو او فعالیتونو په خپرولو او نړیوالو ته رسولو کې به هر اړخیزه همکاري کوي.
