زابل کې د محتسبینو په هڅو یوه کم عمره نجلۍ جبري نکاح څخه وژغورل شوه
د زابل د امر بالمعروف ریاست مسؤلینو د مېرمنو حقونو ته په ژمنتیا او په ټولنه کې د مېرمنو پر وړاندې له تاوتریخوالي د ډکو پېښو د مخنیوي په موخه د قومي مخورو په منځګړیتوب په مرکز قلات ښار کې د یوې کم عمره نجلۍ د ناخوښې نکاح مخنیوی کړی، چې د کورنۍ غړو یې غوښتل د بې معنی غیرت او ناوړه دودونو له مخې یې د هغې له خوښې پرته یوه کس ته په نکاح کړي.
د یاد ریاست محتسبینو په دې تړاو وویل، چې د دغې غیر شرعي قضیې مخه یې ونیوله، چې د یادې کم عمره نجلۍ د کورنۍ غړو د ناوړه دودونو له مخې د هغې له خوښې پرته په نکاح ورکوله.
محتسبین زیاتوي؛ هیڅوک نه شي کولی ازاد انسان په پیسو واخلي او یا یې خرڅ کړي. د اسلامي امارت مسؤلین تل په دې هڅه کې دي، چې خلکو ته د ارام ژوند زمینه برابره کړي.
دا په داسې حال کې ده، چې د امر بالمعروف، نهي عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو د حقونو اړوند د ناخوښه ودولو، کورنيو بندخونو، کورني تاوتریخوالي، ولور او میراث زرګونه قضیې حل کړې دي او په دې اړوند یې کړنې لا هم دوام لري.
