زابل کې محتسبینو له سوداګرو سره د اصلاحي ناستو تر څنګ په زیاته اندازه خوراکي او غیر خوراکي توکي له منځه یو وړل
زابل کې محتسبینو د تاریخ تېر توکو د راټولولو او نرخونو کنټرول کمېټو له بازارونو څخه د څارنې پر مهال له سوداګرو او هتۍوالو سره د اصلاحي ناستو تر څنګ په زیاته اندازه تاریخ تېر خوراکي او غیر خوراکي توکي، ۶۰قلمه حیواني درمل او ۴۰لېتره بې کیفیته او تاریخ تېر زراعتي درمل را ټول او له منځه یو وړل.
محتسبینو له هټۍوالو او سوداګرو وغوښتل، چې ورځنۍ تجارتي کړنې له اسلامي اصولو سره سمې تر سره کړي او په دې برخه کې د هر ډول منکراتو له کولو ډډه وکړي.
د امر بالمعروف، نهی عن المنکر او شکایتونو اورېدلو ریاست مسؤلین وايي، د بازارونو دوامدار څارنه د خلکو د حقونو د خونديتوب، د معیاري توکو د وړاندې کولو او د ټاکل شویو نرخونو او اصولو د مراعت په برخه کې مهم رول لري؛ له همدې امله به د سرغړونو د مخنیوي او د عامه نظم د ټینګښت په موخه خپلې کړنې لا هم جاري وساتي.
