ننګرهار؛ محتسبینو پنځه کلنه ماشومه په بدو کې له ورکولو وژغورله
د ننګرهار د امر بالمعروف، نهي عن المنکر او شکایتونو اورېدلو ریاست مسؤلینو د ښځو حقونو ته په ژمنتیا او په ټولنه کې د ښځو پر وړاندې له تاوتریخوالي د ډکو پېښو د مخنیوي په موخه د دیني عالمانو او قومي مخورو په منځګړیتوب پنځه کلنه ماشومه، چې د کورنۍ غړو یې غوښتل د ناموسي قضيې د حل لپاره یې په بدو کې ورکړي د محتسبینو له لوري وژغورل شوه.
په دې تړاو د یاد ولایت د امر بالمعروف او نهي عن المنکر مسؤولینو وویل: یاده پنځه کلنه ماشومه چې خدیجه نومېږي، د کونړ د ماڼوګۍ ولسوالۍ اوسېدونکې ده، چې اوس مهال د ننګرهار اتمې ناحیې دامان سیمه کې ژوند کوي؛ د کورنۍ غړو یې غوښتل د ناموسي قضیې د غیر شرعي حل په موخه یې په بدو کې ورکړي، محتسبینو مخنیوی وکړ.
دغه راز یاد مسؤلین ډاډ ورکوي، چې هیچا ته به اجازه ور نه کړي، چې د مېرمنو حقوق تر پښو لاندې کړي او په پوره توان به د هغو ټولو بدو پېښو مخنیوی کوي، چې له امله یې د مېرمنو حقوق له ګواښ سره مخ وي.
دا په داسې حال کې ده، چې د امر بالمعروف، نهي عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو د حقونو اړوند د ناخوښه ودولو، کورنيو بندخونو، کورني تاوتریخوالي، ولور او میراث د زرګونو پېښو مخه نیولې او د مېرمنو د حقونو د خونديتوب په برخه کې خپلې هڅې جاري ساتي.
