فاریاب کې محتسبینو ۱۷ مېرمنې له بېلابېلو ظلمونو څخه وژغورلې
د فاریاب ولایت د امر بالمعروف، نهی عن المنکر او شکایتونو اورېدلو ریاست محتسبینو په ټولنه کې د مېرمنو پر وړاندې د ناوړه پېښو د مخنیوي په موخه د دې ولایت په مرکز او ولسوالیو کې په تېرو دوو اونیو کې ۱۷ مېرمنې چې د کورني تاوتریخوالي او ناوړه دودونو په اساس له خپلو شرعي حقونو څخه بې برخې وې له شرعي حقونو څخه برخمنې کړې.
محتسبین وایي: یادې مېرمنې چې له اوږدې مودې راهیسې د ناوړه دودونو پر اساس ځورول کېدلې او حقوق یې تر پښو لاندې شوي و، د محتسبینو په هڅو وژغورل شوې.
ولایتي مسؤلین زیاتوي، چې د یادې شمېرې له مخې ډېری یې هغه مېرمنې دې، چې د خپلو خاوندانو له لوري له دوامداره روحي او فزیکي ځورونې سره مخ وې چې د محتسبینو له لوري وژغورل شوې او له خاوندانو یې ژمنه واخیستل شوه چې په راتلونکي کې د داسې ناوړه کړنو له کولو ډډه وکړي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت ولایتي مسؤلین په دوامداره توګه له ځایي خلکو سره د مېرمنو د حقونو د ورکړې او په دې تړاو د عامه ذهنیت د سمون په موخه اصلاحي ناستې کوي، چې ور سره په دې برخه کې د پام وړ بدلون راغلی ده.
