د امر بالمعروف، نهی عن المنکر او شکایتونو اورېدلو وزارت په اونۍ کې
د امر بالمعروف، نهی عن المنکر او شکایتونو اورېدو وزارت مسؤلینو د هېواد په کچه د اسلامي ارزښتونو د پالنې، مېرمنو د حقونو خوندیتوب، د قومي او ژبني دښمنیو د حل، ټولنیز عدالت د ټینګښت او د ټولنیز اخلاقي سمون لپاره د ټاکل شوې پالیسي پر اساس کړنې تر سره کړې دې.
د امر بالمعروف وزارت وزیر شیخ الحديث محمد خالد الحنفي د کابل اړوند چهاردهي سیمې له دیني عالمانو او قومي مخورو سره ناسته:
د امر بالمعروف، نهی عنالمنکر او شکایتونو اورېدلو وزارت وزیر شیخ الحديث محمد خالد الحنفي د یاد وزارت د ناستو په تالار کې د کابل ولایت اړوند چهاردهي سیمې یو شمېر قومي مشرانو، جهادي څېرو او ځوانانو سره وکتل.
د مېرمنو حقونو ته رسېدنه:
دغه راز محتسبینو په دې اونۍ کې د مېرمنو د حقونو اړوند (۹۴) بېلابېلې قضیې حل کړې دي، چې د یادې شمېرې له مخې (۳۲) د کورني تاوتریخوالي، (۱۷) د میراث، (۱۸) د غیر شرعي نکاح ګانو،(۹) د ولور، (۵) د نفقې ورکړې، (۷) مېرمنو ته شرعي نکاح زمینه برابره شوه او د (۶) مېرمنو د طلاق قضیې حل شوې دې.
د قومي دښمنیو حل:
محتسبینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په کچه (۱۰) دښمنۍ او (۴۸) وړې شخړې حل کړې دي.
د کوډګرو نیول:
د یاد وزارت مسؤلینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه (۷) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دي.
له سوداګرو سره ناستې:
او وروستی خبر دا، چې محتسبینو په بازارونو کې د سود، احتکار، ترازو کې د کموالي، د تاریخ تېره او بې کیفیته موادو د خرڅلاو د مخنیوي په موخه له سوداګرو او هټۍوالو سره (۱۹۳) اصلاحي ناستو تر څنګ تر پنځوس ټنو زیات تاریخ تېر او بې کیفیته خوراکي او غیر خوارکي توکي هدر کړي دې.
