نورستان کې محتسبینو له دیني عالمانو، قومي مخورو او ځوانانو سره د منکراتو د مخنیوي او ګډې همکارۍ په موخه ناسته وکړه

د نورستان ولایت د امر بالمعروف، نهی عن المنکر او شکایتونو اورېدلو ریاست محتسبینو د سیمې له دیني عالمانو، قومي مخورو او ځوانانو سره د امر بالمعروف وزارت د قانون د پلي کولو او په ټولنه کې د ناوړه د دودونو د مخنیوي او په دې برخه کې د ګډې همکارۍ او همغږۍ په موخه ناسته وکړه.
دا ولسي ناسته چې موخه یې په ټولنه کې د ناوړه دودونو مخنیوی او په دې برخه کې له محتسبینو سره مرسته وه؛ محتسبینو وویل: په ټولنه کې د علماوو، قومي مخورو او ځوانانو کړنې د ټولنې د اصلاح، د شریعت د تطبیق، او قوانینو د تنفیذ په برخه کې حیاتي رول لري او له هغوی یې وغوښتل، چې په ټولنه کې د ناوړه دودونو د مخنیوي او عامه پوهاوي په برخه کې دې له بېلا بېلو لارو څخه له محتسبینو سره همکاري وکړي.
دغه راز ناستې ته دیني عالمانو، قومي مخورو او ځوانانو د منکراتو د له منځه وړلو، د ښځو سره د تاوتریخوالي د مخنیوي، او په ټولنه کې د دیني ارزښتونو د پیاوړتیا په برخه کې کار کول خپل دیني او هېوادنی مسؤلیت یاد کړ او  ژمنه یې وکړه چې د اسلامي ټولنې د سالمې ودې لپاره به په ګډه کار کوي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت ولایتي مسؤلین له دیني عالمانو، قومي مخورو او ځوانانو سره د عامه ذهنیت د سمون، مېرمنو د حقونو خوندیتوب او په نورو برخو کې اصلاحي ناستې کوي چې ور سره په یادو برخو کې د معروفاتو په اقامې او د منکراتو په مخنیوي کې د پام وړ بدلون راغلی