فراه کې د محتسبینو په هڅو د یوې کورنۍ غړي له دوولس کلنې نادرکۍ وروسته له خپلې کورنۍ سره یو ځای شول
د فراه ولایت د امر بالمعروف، نهی عن المنکر او شکایتونو اورېدلو ریاست محتسبینو هغه مېرمن، چې دوولس کاله وړاندې له خپلو څلورو اولادونو سره د کورني تاوتریخوالي له امله له کور څخه وتلې وه پیدا او بېرته له خپل خاوند او اولادونو سره یو ځای کړه.
په تړاو یې د دې ولایت د امر بالمعروف رئیس مولوي عبدالمجید صمیم وایي : یاده مېرمن چې د هرات ولایت د شینډنډ ولسوالۍ اوسېدونکې ده، چې اوسمهال د فراه ولایت روکن کلي کې ژوند کوي، د خاوند د ناوړه چلند له امله له کور څخه وتلې وه چې د محتسبینو په هڅو بېرته له خپلې کورنۍ او اولادونو سره یوه ځای شوه.
محتسبینو د یادې مېرمنې له خاوند څخه ژمنه اخیستې چې له دې وروسته به له خپلې مېرمنې او اولادونو سره ناوړه چلند نه تر سره کوي او ټولو شرعي حقونو ته به یې رسېدنه کوي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت مسؤلینو د هېواد په کچه زرګونه مېرمنې له کورني تاوترخوالي، کورني بند، غیر شرعي نکاح ګانو او ځان وژنې څخه ژغورلې دي او سلګونه مېرمنې یې د میراث له شرعي حقونو څخه برخمنې کړې دي.
