محتسبینو په روزګان ولایت کې اویا کلن سپین ږیري ته د ځوانې نجلۍ د غیر شرعي نکاح مخنیوی وکړ
د روزګان ولایت د امر بالمعروف ریاست مسؤلینو د خپلو کړنو پر مهال یوه ځوانه نجلۍ چې ترونو یې غوښتل د نوموړې له خوښې پرته یې د زیاتو پیسو په بدل کې اویا کلن سپین ږیري ته په غیر شرعي نکاح ورکړي، مخنیوی وکړ.
محتسبین وایي: یاده نجلۍ چې پلار یې ګونګ و او رواني حالت یې هم ښه نه و، د نوموړې نجلۍ کاکا غوښتل، چې اویا کلن سپین ږیري ته یې د زیاتو پیسو په بدل کې ورکړي چې د محتسبینو له لوري د دې ناوړه عمل مخه ونیول شوه.
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
دا په داسې حال کې ده، چې د امر بالمعروف، نهې عنالمنکر او شکایتونو اورېدلو وزارت د مېرمنو د حقونو خوندیتوب خپل لومړیتوب ګني او ډاډ څرګندوي چې هېڅ چا ته به اجازه ورنکړي څو د مېرمنو حقونه تر پښو لاندې کړي.
