د محتسبینو د تعلیم او تربیت ریاست له لوري په ټول هېواد کې د محتسبینو لپاره څلور ورځني روزنیز سمینارونه پیل شول
د امر بالمعروف، نهی عن المنکر او شکایتونو اورېدلو وزارت اړوند د محتسبینو د تعلیم او تربیت ریاست له لوري د هېواد په کچه د محتسبینو د ظرفیت لوړونې، دعوتي تګلارې، له خلکو سره د غوره چلند کولو، د قانون اورولو او په ټولنه کې د ناوړه دودونو د مخنیوي پر لارو چارو څلور ورځني روزنیز سمینارونه پیل شول.
د روزنیزو سمینارونو دا روزنیزه لړۍ، چې د محتسبینو د تعلیم او تربیت ریاست د جیدو شیوخ کرامو له لوري پر مخ وړل کېږي، چې تر دې دمه یې د هېواد په بامیانو، میدان وردګ، زابل او غزني ولایتونو کې سمینارونه تر سره کړي دي، چې د روزنیزو سمینارونو دا لړۍ به نورو ولایتونو ته هم وغځېږي.
په دې تړاو د محتسبینو د تعلیم او تربیت ریاست رئیس مولوي رازمحمد حامد وویل: چې د وزارت مقام په لارښوونه محتسبینو ته له روزنیزو سمینارونو څخه یې موخه د قانون اورول، د محتسبینو ظرفیت لوړونه، له خلکو سره غوره چلند او په ټولنه کې د ناوړه دودونو د مخنیوي پر لارو چاو خبرې کول دي.
دغه راز محتسبین د روزنیزو سمینارونو دا لړۍ د ځان په ګټه بولي او زیاتوي، چې له دې سره به په ټولنه کې د ډېری منکراتو مخه په ښه ډول ونیول شي او دوی به تر پخوا په قوي ډول د ټولنې د سمون لپاره خپلې هڅې ګړندۍ کړي.
د یادولو وړ ده، چې د امر بالمعروف وزارت له لوري په هرو درې میاشتو کې، د ټولو ولایتونو محتسبینو لپاره یو میاشتني روزنیز سمینارونه تر تیبېږي چې د قانون اورولو تر څنګ په ټولنه کې د هر ډول منکراتو د مخنیوي پر لارو چارو بحث او خبرې کېږي.
