محتسبینو په میدان وردګ، غزني، زابل او خوست ولایتونو کې (۷) مېرمنې له خپلو شرعي حقونو څخه برخمنې کړې.
د امر بالمعروف، نهې عن المنکر او شکایتونو اورېدلو وزارت اړوند د غزني، میدان وردګ، زابل او خوست ولایتونو محتسبینو اووه مېرمنې، چې له خپلو ټولو شرعي حقونو څخه بې برخې او له جدي کورني تاوتریخوالي سره مخ وې وژغورلې او له خپلو شرعي حقونو څخه برخمنې شوې.
د محتسبینو په وینا: یادې مېرمنې چې له اوږدې مودې راهیسې د بې معنی غیرتونو او ناوړه دودنو پر اساس زورول کېدلې او له جدي کورني تاوتریخوالي سره مخ وې د محتسبینو له لوري وژغورل شوې او له خپلو شرعي حقونو څخه برخمنې شوې.
محتسبین ډاډ څرګندوي، چې په پوره توان به د مېرمنو له شرعي حقونو څخه دفاع کوي او د هغو ناسمو دودونو مخه به نیسي چې له امله یې د مېرمنو شرعي حقوق له ګواښ سره مخ دي.
د یادولو وړ ده، چې د دې وزارت محتسبینو د مېرمنو د نورو حقونو لکه میراث، ولور، نفقې او خپلې خوښې نکاح تر څنګ لسګونه مېرمنې له کورني تاوتریخوالي او کورنیو بندخونو څخه ژغورلې دي.
