پکتیا کې محتسبینو د یوې اجباري نکاح مخنیوی وکړ
د پکتیا ولایت د امر بالمعروف، نهی عن المنکر او شکایتونو اورېدلو ریاست محتسبینو د مېرمنو حقونو ته په ژمنتیا د دې ولایت په لجه منګل ولسوالۍ کې یوه مېرمن له اجباري نکاح څخه وژغورله.
په دې تړاو د یاد ولایت محتسبین وایي: یاده مېرمن چې د پکتیا ولایت د لجه منګل ولسوالۍ اوسېدونکې ده؛ یوه کس غوښتل چې په جبري توګه یې په نکاح کړي، چې د یادې ولسوالۍ محتسبینو پر یاده قضیه له خبرېدو وروسته د مېرمنې د شرعي حق د ورکړې په موخه یاده مېرمن له اجباري نکاح څخه وژغورله.
محتسبین ډاډ څرګندوي، چې د ټولنې د شرعي، اخلاقي او قانوني ارزښتونو د خوندي ساتلو لپاره به خپلې هڅې لا نورې هم ګړندۍ کړي.
بلخوا ځایي اوسېدونکي دا پرېکړه د ټولنیز عدالت د تأمین، د مېرمنو پر وړاندې له تاوتریخوالي د ډکو پېښو د مخنیوي او په ځانګړي ډول د جبري ودونو د مخنیوي غوره ګام بولي.
