میدان وردګ کې محتسبینو د سیمې د امنیتي ارګانونو په مرسته پر (۳) جریبه ځمکه کرل شوي تاریاک له منځه یو وړل
د امربالمعروف، نهې عن المنکر او شکایتونو اورېدلو وزارت اړوند د میدان وردګ ولایت محتسبینو د دې ولایت په سید آباد ولسوالۍ کې، د سیمې د امنیتي ارګانونو په همغږۍ پر څه باندې (۳) جریبه ځمکه کرل شوي نشه یي توکي (تاریاک) له منځه یووړل او له کروندګرو یې وغوښتل، چې د نشه یي موادو له کښت، کارولو او قاچاق څخه په کلکه ډډه وکړي.
محتسبینو له کروندګرو وغوښتل، چې په دې برخه کې د عالیقدر امیر المؤمنین حفظه الله د صادر شویو حکمونو او هدایاتو پر اساس کړنې تر سره کړي، تر څو په ټولنه کې د دې ناوړه پدیدې مخه ونیول شي او د منکراتو کچه را ښکته شي.
د یادولو وړ ده، چې تر دې وړاندې هم د امربالمعروف، نهې عن المنکر او شکایتونو اورېدلو وزارت محتسبینو د هېواد په کچه د داسې او ورته ناوړه کړنو مخه نیولې او د معروفاتو د اقامې په موخه یې کړنې لا هم دوام لري.
