بغلان کې شپږ تنه د شراب څښلو په تور ونیول شول
د بغلان ولايت د امر بالمعروف، نهې عن المنکر او شکایتونو اورېدلو وزارت محتسبینو د تاله وبرفک ولسوالۍ د عاشقانو درې په سیمه کې شپږ تنه د شراب څښلو په تور نیولي دي.
د محتسبینو په وینا یاد کسان یې په مېلمستون کې د شراب څښلو پر مهال نیولي دي، هغوی زیاتوي چې نیول شوي کسان په د شراب څښلو ترڅنګ په نورو غیر شرعي کړنو هم بوخت وو.
هغوی همداراز ډاډ ورکوي چې په ټولنه کې د خرافاتو، بدو رواجونو، غیر شرعي کړنو او فساد مخنيوي ته ژمن دي او هېچا ته به اجازه ور نه کړي چې ټولنه بې لارۍ ته سوق کړي.
یاده دې وي چې نیول شوي کسان به له لومړنیو څېړنو وروسته اړوندو ارګانونو ته وسپارل شي.
دا په داسې حال کې ده چې د امر بالمعروف، نهې عن المنکر او شکایتونو اورېدلو وزارت له دې وړاندې هم د ټولنې اصلاح ته په ژمنتیا د ورته سلګونو پېښو مخنیوی ترسره کړی دی.
