میدان وردګ ولایت کې محتسبینو یوه مېرمن له شپږ میاشتني کورني تاوتریخوالي څخه وژغورله
د میدان وردګ ولایت اړوند د جلرېز ولسوالۍ محتسبینو د سیمې د دیني عالمانو او قومي مخورو په منځګړیتوب یوه مظلومه مېرمن له شپږ میاشتني کورني تاوتریخوالي څخه وژغوله.
د محتسبینو په وینا: یاده میرمن چې د جلرېز ولسوالۍ سرچشمي سیمې اوسېدونکې ده، وروسته له هغه له خپلو شرعي حقونو برخمنه شوه چې نوموړې مېرمن د یادې ولسوالۍ محتسبینو ته د خپلو شرعي حقونو د تر لاسه کولو په موخه عارضه شوه.
دغه راز محتسبینو د یادې میرمنې خاوند ته د شریعت په رڼا کې د میرمنو حقوق بیان کړل او له نوموړي یې وغوښتل چې په راتلونکي کې د داسې کړنو له تر سره کولو ډډه وکړي.
بل خوا د سیمې خلک د محتسبینو دغه کړنې ستایي او دغه کار د اسلامي ارزښتونو د پلي کېدو او کورني عدالت د تأمین لپاره غوره ګام بولي.
