د کاپيسا ولايت د آله سای ولسوالۍ د محتسبینو په منځګړیتوب د ترافیکي پېښې شخړه حل شوه
د کاپیسا ولایت د امر بالمعروف، نهې عن المنکر او شکایتونو اورېدلو ریاست اړوند د آله سای ولسوالۍ محتسبینو د سیمې د دیني علماوو او قومي مشرانو په منځګړیتوب، د دوو کورنیو ترمنځ د ترافیکي پېښې له امله راپورته شوې شخړه پای ته ورسوله.
په دغه جوړه شوې ناسته کې چې محتسبینو، علماوو او قومي مخورو ګډون درلود، محتسبینو دواړو لوریو ته د خفګان او د دښمنۍ په بدو پایلو خبرې وکړې او له متضرر لوري یې وغوښتل چې بښنه وکړي او دښمني پای ته ورسوي.
د محتسبینو او دیني علماوو تر خبرو وروسته متضرر لوري مقابل لوري ته بښنه وکړه او له محتسبینو یې د دوی د دوامداره هڅو په پار مننه وکړه، چې د ولس تر منځ دښمنۍ ختموي.
دا په داسې حال کې ده، چې تر دې وړاندې هم محتسبینو د هېواد په کچه زیاتو دښمنیو ته د پای ټکی ایښی.
