وروسته له دې به په خپلو کې سره د وروڼو په څېر ژوند تېروي
د فراه ولایت د امربالمعروف، نهی عن المنکر او شکایتونو اورېدلو ریاست محتسبینو د یاد ولایت په مرکز کلاته حاجي سرور کلي کې د دوو قومونو تر منځ څو کلنه دښمني په دوستۍ بدله کړه.
د فراه ولایت محتسبینو په دې اړه وویل، یاده دښمني چې له څو کلونو راهیسې د دوو قومونو ترمنځ د کورنیو ستونزو په سر را پورته شوې وه او دواړو لوریو ته یې مالي او ځاني تاوانونه هم اړولي وو، د محتسبینو، دیني عالمانو او د یادې سیمې د قومي مشرانو لخوا د شریعت په رڼا کې په دوستۍ بدله کړه.
دواړو لوریو د یاد ولایت له محتسبینو مننه وکړه او ژمنه یې وکړه، چې وروسته له دې به په خپلو کې سره د وروڼو په څېر ژوند تېروي او یو بل ته به مشکلات نه جوړوي.
دا په داسې حال کې د، چې تر دې مخکې هم محتسبینو د هېواد په کچه سلګونه داسې دښمنۍ په دوستۍ بدلې کړې او ولس ته ډاډ ورکوي چې خپل فعالیتونه به په دې برخه کې نور هم ګړندي کړي.
