د امر بالمعروف، نهې عنالمنکر او شکایتونو اورېدلو وزارت سرپرست وزیر هرات ته سفر وکړ
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د امر بالمعروف او نهې عنالمنکر قانون لا ښه پلي کېدو، د خلکو د ستونزو اورېدلو، معروفاتو اقامې او منکراتو مخنیوي او عامه پوهاوي په موخه هرات ولایت ته ولاړ او د یوې غونډې په ترڅ کې یې د دې ولایت له ملکي او نظامي مسؤولینو، علماء کرامو، قومې مشرانو، ګذر وکیلانو او ګڼ شمېر ځوانانو او زده کړیالانو سره وکتل.
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د امر بالمعروف او نهې عنالمنکر پر ارزښت وغږېد او ویې وویل: امر بالمعروف وزارت دنده لري ترڅو په ټولنه کې د اصلاح راوستلو او د منکراتو مخنیوی ترڅنګ د خلکو ستونزو ته رسېدنه وکړي چې د یادې چارې لاښه ترسراوي او خلکو ته اسانتيا په موخه یې د (۱۹۱) وړیا شمېره فعاله کړې چې خلک کولای شي له دې لارې خپل شکایتونه ثبت کړي.
ښاغلي الحنفي زیاته کړه چې په تېرو کلونو کې د ناوړه دودونه له امله د ټولنې ډېری وګړي په ځانګړې توګه خویندې له خپلو حقونو بې برخې وې او ټینګار یې وکړ چې د امر بالمعروف وزارت په ټولنه کې د ناوړه دودونو له منځه وړلو ته ژمن دی او هیچا ته به اجازه ورنکړل شي ترڅو په ناوړه او شریعت خلاف کړنو لاس پورې کړي.
شیخ صاحب همدا راز د خپلو خبرو په دوام کې له محتسبینو وغوښتل ترڅو په خپلو دعوتي او اصلاحي چارو کې له نرمښت او غوره چلند کار واخلي او د ولسي وګړو خصوصي حريم ته درناوی وکړي هغه همداراز له ځایي مسؤولینو، قومي مشرانو او دیني عالمانو وغوښتل چې د امر بالمعروف او نهې عنالمنکر قانون پلي کولو او تر نورو رسولو کې له یاد وزارت سره مرسته وکړي.
ورته مهال ځایي مسؤولینو، قومي مشرانو او دیني عالمانو په خپلو خبرو کې د ټولنې اصلاح او مثبت فکري بدلون کې د امر بالمعروف وزارت ونډه اساسي وبلله او ډاډ یې ورکړ چې د امر بالمعروف او نهې عنالمنکر قانون پلي کولو ته ژمن دي او یاده برخه کې به بشپړه هڅه کوي.
هېره دې نه وي چې ښاغلي شیخ محمد خالد الحنفي صاحب د یادې ناستي په څنډه کې د هرات ولایت اهل تشيع عالمانو، سوداګرو او د خصوصي روغتونونو مسؤولینو سره هم وکتل او د هغوی د ستونزو او شکایتونو اورېدلو ترڅنګ یې د امر بالمعروف ولایتي مسؤولینو ته هدایت ورکړ ترڅو یادې ستونزې او شکایتونه وڅېړي او حل کړي.
