د امر بالمعروف، نهې عنالمنکر او شکایتونو اورېدلو وزارت سرپرست وزیر د اسلامي هېوادونو د همکاريو سازمان عمومي رئیس سره وکتل
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب په افغانستان کې د اسلامي هېوادونو د همکاريو سازمان عمومي رئیس ډاکټر محمد سعيد آل عیاش او مل پلاوي سره په خپل کاري دفتر کې وکتل.
په دې کتنه کې دواړو لوریو د امربالمعروف او نهې عن المنکر نوي توشیح شوي قانون پر وضاحت او خپل منځي همکاریو هر اړخیزې خبرې وکړې.
ښاغلي الحنفي صاحب په خپلو خبرو کې وویل: امر بالمعروف او نهې عنالمنکر چې د ټولو مسلمانانو دیني وجيبه ده، د یادې کړنې د لا ښه ترسراوي په موخه (د امر بالمعروف او نهې عنالمنکر نوی توشیح شوی) قانون د اسلامي شریعت، نبوي احاديثو او حنفي فقهې په رڼا کې جوړ شوی دی.
هغه ټینګار وکړ چې د اسلامي شریعت پلي کول د اسلامي نظام دنده او د افغاني ټولنې غوښتنه ده او په یاده برخه کې به له هېڅ ډول هڅو درېغ ونکړي.
نوموړي همداراز ښاغلي آل عیاش ته ډاډ ورکړ له یاد سازمان سره بشپړې او هر اړخیزې همکارۍ ته ژمن دی او له هغوی هم وغوښتل ترڅو خپلو همکاریو ته دوام ورکړي.
همداراز ښاغلي الیاس د الحنفي صاحب له مېلمه پالنې مننه وکړه او د امر بالمعروف وزارت فعالیتونه یې مثبت او د ستایلو وړ وبلل.
نوموړي همداراز امر بالمعروف او نهې عنالمنکر د اسلامي نظام اړینه او اساسي دنده وبلله او د ټولنې په اصلاح کې یې د امر بالمعروف او نهې عنالمنکر رول مثبت او ارزښتمن و ارزوو.
