د امر بالمعروف، نهې عنالمنکر او د شکایتونو اورېدلو وزارت سرپرست وزیر زابل ته سفر وکړ
د امر بالمعروف، نهې عنالمنکر او د شکایتونو اورېدلو وزارت سرپرست وزیر شیخ محمد خالد الحنفي صاحب د امیر المؤمنین حفظه الله د فرمانونو، حکمونو او لارښوونو ترڅنګ د امر بالمعروف او نهې عنالمنکر قانون د لا ښه پلي کېدو، د معروفاتو اقامې او منکراتو له منځه وړلو، عامه پوهاوي او همغږۍ په موخه زابل ولایت ته سفر وکړ او هلته یې د یاد ولایت له ملکي او نظامي مسؤولینو، دیني عالمانو، خطیبانو، قومي مشرانو او ګذر وکیلانو سره وکتل.
د امر بالمعروف، نهې عنالمنکر او د شکایتونو اورېدلو وزارت سرپرست وزیر شیخ محمد خالد الحنفي صاحب ټینګار وکړ چې اسلامي امارت د اسلامي شریعت پلي کولو ته ژمن دی او د یادې چارې لپاره د امر بالمعروف او نهې عنالمنکر وزارت جوړ شوی دی او زیاته یې کړه چې ټول محتسبین له خلکو سره په ښه چلند مکلف دي او خلک باید په ښه طریقه د معروفاتو ترسره کولو ته دعوت کړي.
نوموړي همدارنګه وویل: امر بالمعروف او نهې عنالمنکر د ټولو مسؤولینو، دیني عالمانو او قومي مشرانو ګډ مسؤولیت دی او زیاته یې کړه چې دیني عالمان مکلفیت لري ترڅو د منبر او محراب له لارې د ټولنې په سمون او فکري جوړښت کې برخه واخلي.
همداراز ښاغلي الحنفي صاحب له ټولو ګډونوالو وغوښتل ترڅو د یووالي او صمیمیت فضا رامنځته او د قومي او سمتي توپیرونو مخنیوي ترڅنګ د امر بالمعروف او نهې عن المنکر برخه کې له محتسبینو سره بشپړه همکاري وکړي.
ورته مهال ځایي مسؤولینو، دیني عالمانو او قومي مشرانو د ښاغلي شیخ صاحب ورتګ زابل ولسونو لپاره ویاړ وباله او ویې ویل چې په زابل ولایت کې د منکراتو کچه صفر ته رسېدلې ده او ټول مسؤولین، دیني عالمان او قومي مشران د امر بالمعروف او نهې عنالمنکر ریاست محتسبینو سره بشپړ همکار او همغږي دي.
نوموړو همدارنګه ډاډ ورکړ چې د امیر المؤمنین حفظه الله له لوري صادر شویو فرمانونو، حکمونو او لارښوونو ترڅنګ د امر بالمعروف او نهې عنالمنکر قانون پلي کولو او تر نورو رسولو ته ژمن دي.
هېره دې نه وي چې ښاغلي وزیر صاحب د یوې جلا ليدنې په ترڅ کې د یاد ولایت مرکز او ولسوالیو محتسبینو سره ولیدل او هغوی ته یې د چارو ښه مخته وړلو په موخه اړینې لارښوونې وکړې او ترې ویې وغوښتل ترڅو په خپلو چارو کې د نوي قانون په رڼا کې د حکمت او ښه چلند څخه کار واخلي، تر څو په ټولنه کې د صمیمیت او یووالي لامل شي.
