د امر بالمعروف وزارت سرپرست وزیر د اسلامي همکارۍ سازمان له مرستیال او د افغانستان لپاره ځانګړي استازي، ښاغلي طارق علي بخيت سره ناسته ترسره کړه
په دې ناسته کې په افغانستان کې د اسلامي قوانینو د ټينګښت، اقتصادي پياوړتيا، نشه یې موادو پر وړاندې مبارزې، د اسلامي نړۍ له هېوادونو سره د افغانستان د اړيکو، د ښځو د اسلامي حقونو او نورو موضوعاتو په تړاو خبرې وشوې.
د امر بالمعروف، نهې عن المنکر او شکایتونو اورېدلو وزارت سرپرست وزیر شیخ محمد خالد الحنفي د اسلامي همکاریو سازمان له غړو هېوادونو سره اړيکو ته په اشارې وويل، چې د افغانستان اسلامي امارت د اسلامي هېوادونو سره په دیني، فرهنګي، سياسي، اقتصادي او تعليمي ډګرونو کې د اړيکو پياوړتيا او د اسلامي مشترکو ګټو د تحقق او ګډو ننګونو ته د حل لارې موندلو په پار رغنده تعامل ته ځانګړی ارزښت ورکوي.
دغه راز ښاغلي حنفي صاحب د ښځو د حقونو په تړاو وویل: اسلامي امارت د ښځو مشروع حقونو ته ژمن دی او هېڅ چاته به اجازه ور نه کړي چې د ښځو حقوق تر پښو لاندې کړي. همدا راز یې د خپلو خبرو په دوام زیاته کړه: مونږ په تېرو درېیو کلونو کې د زرګونو مېرمنو میراث آخیستی او ورته مو تسلیم کړی دی او دغه راز مو د ښځو په بدو کې د ورکولو ناوړه دود چې ښځې به په بدو کې ورکول کېدې په بشپړ ډول له منځه وړی دی.
د اسلامي همکاریو سازمان مرستیال او د افغانستان لپاره ځانګړي استازي، ښاغلي طارق علي بخيت او د هیئت نورو غړو د اسلامي نړۍ د علماوو هیئت د ښه کوربتوب له کبله د اسلامي امارت او په ځانکړې توګه د امربالمعروف، نهې عن المنکر او شکایتونو اورېدلو وزارت څخه مننه وکړه او زياته يې کړه چې د اسلامي همکاريو سازمان له اسلامي امارت سره پر مثبت تعامل باور لري او په بېلابېلو برخو کې به د افغانستان ملاتړ ته دوام ورکړي.
دغه راز ښاغلي بخیت زیاته کړه، چې د امربالمعروف، نهې عن المنکر او شکایتونو اورېدلو وزارت هڅې د منکراتو د مخنیوي په برخه کې د ستایلو وړ دي.
نوموړي په افغانستان کې دیني مدارسو ته د اسلامي امارت او په ځانګړې توګه د امربالمعروف وزارت پاملرنه د ستایلو وړ وبلله.
د هیئت غړو زیاته کړه، چې په راتګ سره یې ټولې هغه اندېښنې له منځه ولاړې چې د ښځو د حقونو په تړاو یې درلودې، چې ګنې اسلامي امارت د ښځو حقوق تر پښو لاندې کړي او همدارنګه د رسنیو له لوري د ښځو د حقونو په تړاو نشرېدونکې ډنډورې یې ناسمې او بې بنسټه وبللې.
په پای کې راغلي هیئت ژمنه وکړه چې نړۍ ته به د اسلامي امارت خصوصا د امربالمعروف وزارت رښتینی انځور وړاندې کوي او ټول هغه منفي تبلیغات به ردوي چې نړۍ یې د اسلامي امارت پر وړاندې لري.
