پکتیکا کې محتسبینو د ناوړه دودونو د مخنیوي په موخه له دیني عالمانو او قومي مخورو سره ناسته وکړه.
د پکتیکا امربالمعروف، نهی عن المنکر او شکایتونو اورېدلو ریاست د یاد ولایت مرکز ښرنې د بېلابېلو کلیو له دیني عالمانو، قومي مخورو او د مسجدونو امامانو سره د معروفاتو اقامې، منکراتو مخنیوي، ناوړه دودونو د مخنیوي او همغږۍ په موخه ناسته کړه.
جوړې شوې ناستې ته د دې ولایت د امربالمعروف رئیس، مولوي رحمت الله محق وویل، چې دیني عالمان او قومي مخور دې په ټولنه کې د معروفاتو په اقامې او د منکراتو په مخنیوي کې د محتسبینو همکاري وکړي او پر هغوی یې غږ وکړ، چې د حج، خوښیو، غم او نورو مراسمو کې د ناوړه رواجونو او د سود مخنیوي لپاره دې له محتسبینو سره په ګډه جدي کړنې تر سره کړي څو ټولنه کې د ناوړه دودونو مخه ونیول شي.
د پکتیکا علماوو شورا مرستیال مولوي احمد شاه وویل، د ټولو ګډ مسئولیت دی، چې راتلونکی نسل او ځوانان په نېکو اخلاقو، اسلامي عقیدې او له دیني تګلارې سره سم وروزو. نوموړي زیاته کړه، د اسلامي مسئولیت له مخې دې خلک د بدو دودونو د مخنیوي لپاره هڅې وکړي.
د مشرانو په استازیتوب قومي مخور حاجي پاچا خان وویل، په ټولنه کې د خوښیو، غم او نورو مراسمو کې اوس هم ناوړه دودونه ترسره کېږي، خلک یې له اقتصادي او نورو ستونزو سره مخ کړي دي، چې د مخنیوي لپاره به یې له امربالمعروف ریاست سره په ګډه کار وکړي.
