نورستان کې د دوو قومونو ترمنځ پخوانۍ دښمني په دوستۍ بدله شوه
د نورستان ولایت د دواب ولسوالۍ محتسبینو د ټولنې اصلاح او ټولنیز عدالت ټينګښت په برخه کې د هڅو په دوام کې د دوو قومونو ترمنځ هغه پخوانۍ او اوږدمهاله دښمني چې له کلونو راهیسې روانه وه او له امله یې د دواړو لوریو ۷ تنه وژل شوي او ۴ نور ټپیان شوي وو، حل او په دوستي بدله کړه.
د محتسبینو په وینا یاده دښمني چې د کلیوالي ستونزو او شخړو له امله راپورته شوې وه له کلونو راهیسی د ګڼو بد مرغیو ترڅنګ دواړو لوریو ته ګڼ مالي او ځاني زیانونه هم رسولي وو.
محتسبین همدا راز ډاډ ورکوي چې د ټولنې اصلاح او د ولسونو ستونزو حلولو کې به له هېڅ راز هڅو ډډه ونه کړي او له خلکو هم غواړي چې د معروفاتو اقامې او منکراتو مخنیوي کې له محتسبینو سره مرسته وکړي.
بلخوا د یادې سیمي ځایي مسؤولین، قومي مشران او ځایي اوسیدونکي د محتسبینو هڅې ستایي او ډاډ ورکوي چې د ټولنې اصلاح او اسلامي ارزښتونو دودولو کې به له محتسبینو سره بشپړه همکاري کوي.
دا په داسې حال کې ده چې امر بالمعروف، نهې عنالمنکر او شکایتونو اورېدلو وزارت محتسبینو د تېرې میاشتې په اوږدو کې د هېواد په کچه ۹۳ قومي شخړې او دښمنۍ حل کړې دي.
