روزګان کې محتسبینو د دوو اجباري نکاحو مخه نیولې
د روزګان ولایت محتسبین وایي، په یاد ولایت کې د هغې پېښې مخه نیولې چې له امله یې دوه سپين ږیرو پلرونو غوښتل خپلې ځوانې لوڼې د هغوی له خوښې پرته یوبل ته په نکاح ورکړي.
هغوی زیاتوي چې دغه کسانو عمرونه د اویا کلونو شاؤخوا دي او په یاده برخه کې یې د خپلو لوڼو خوښه په پام کې نه وه نیولې، چې محتسبینو له خبرېدو سره سم د یادې پېښې د مخنیوي ترڅنګ یې یادې مېرمنې له خپلو حقونو برخمنې کړي او دواړو کورنیو ته یې د مېرمنو حقونو په تړاو معلومات ورکړي دي.
محتسبین همداراز ډاډ ورکوي، چې د میرمنو د حقونو ساتنې ته ژمن دي او هېڅوک حق نه لري چې د ناوړه دودونو او یا خپلو شخصي سلیقو له مخې د چا حقونه تر پښو لاندې کړي.
یاده دې وي چې د امر بالمعروف، نهې عنالمنکر او شکایتونو اورېدلو وزارت له دې وړاندې هم د ورته زرګونو پېښو مخه نیولې ده.
