د ننګرهار محتسبینو د الحمزه استشهادي کنډک څخه لیدنه وکړه
یکشنبه، شوال ۲۹، ۱۴۴۳
د ننګرهار ولایت محتسبینو د دې ولایت د میدان هوايي، فاتح ځواک او الحمزه استشهادي کنډکونو له مسؤلینو سره وليدل او له هغوی يې وغوښتل چې د امیـــ رالمــ ؤمنی ن له طرفه شوي عمومي عفوه په عمل کې ثابته کړي.
دې لیدنه کې محتسبینو نظامي منسوبینو او مسؤلینو ته د امربالمعروف وزارت له لوري وضع کړل شوي فرمانونه بیان کړل او له هغوی یې وغوښتل چې خپل سیرت او صورت د نبوي ارشاداتو سره سم جوړ کړي او لمونځونه په جماعت سره ادا کړي.
محتسبینو وویل: دا چې ټولو ته څرګنده ده چې د اسلامي نظام لپاره مجاهدینو خپل ځانونه قرباني کړل نو اوس لازمه ده چې موږ د هغوی دغه ارمان په احسنه طریقه سره پوره کړو.
دغه راز محتسبینو د امیرالمؤمنین فرمان ته په اشارې سره وویل: هیڅ نظامي مسؤل ته اجازه نشته چې زموږ هیوادوال وځوروي، او یا د عمومي عفوي خلاف عمل ترسره کړي.
دوی دغه راز له نظامي مسؤلینو غوښتنه وکړه چې کم عمره هلکان له خپلو لیکو څخه بهر کړي او هغوی ته د زده کړو زمینه برابره کړي.
