د امر بالمعروف وزارت سرپرست وزیر له افغان بهر مېشتو سیاسي څهرو او سوداګرو سره ناسته ترسره کړه

د امر بالمعروف، نهې عن المنکر او شکایتونو اورېدلو وزارت سرپرست وزیر شیخ محمد خالد الحنفي له افغان بهر مېشتو سیاسي څهرو او سوداګرو سره د یاد وزارت په مقر کې د همغږۍ په موخه ناسته ترسره کړه.

یاد سیاسیون او سوداګر چې له مختلفو اروپايي هېوادونو څخه راغلي وو، په خپله لیدنه کې د امر بالمعروف، نهی عن المنکر اوشکایتونو اورېدلو وزارت او په ټوله کې د اسلامي امارت لاسته راوړنې د ستایلو وړ وبللې او زیاته یې کړه: دا د خوښۍ ځای دی چې اسلامي امارت وکولای شول په دومره کم وخت کې لویې لاسته راوړنې ولري.

دغه راز یې د امر بالمعروف، نهې عن المنکر او شکایتونو اورېدلو وزارت له لوري د خلکو د شکایتونو اورېدلو  برخه کې د یاد وزارت ستاینه وکړه او وې ویل: دا لومړی ځل دی چې هېواد وال په دومره ډاډه زړه او پرته له وېرې خپل شکایت تر مسؤولو چارواکو رسوي، چې دا یوه غوره لاسته راوړنه ده.

همدا راز یې د خپلو خبرو په لړ کې وویل: ټولې هغه اندېښنې چې مخکې له راتګ څخه یې د ښځو د حقونو په تړاو درلودې له منځه ولاړې او ډاډه شول؛ ټولې هغه ډنډورې چې نړیوال او ځينې کړۍ یې د افغان ښځو د حقونو په تړاو لري بې بنسټه او ناسمې وبللي.

د یاد وزارت سرپرست وزیر شیخ محمد خالد الحنفي راغلو مېلمنو ته د ښه راغلاست تر څنګ د نوموړو د خبرو تر اورېدو وروسته ډاډ‌ ورکړ او وې ویل: د مېرمنو ټول حقوق چې اسلام مبارک دین ورکړي حتماً یې ورکوي او هېڅ چا ته به اجازه ور نه کړي چې د مېرمنو حقوق تر پښو لاندې کړي.

ښاغلي حنفي صاحب زیاته کړه: د امارت په راتګ سره د ښځو ټول هغه حقوق چې مخکې به تر پښو لاندې کېدل او نه به ورکول کېدل تأمین شوي دي او ښه مثال یې د ښځو میراث او د هغوي په بدو کې ورکول یاد کړل، چې امر بالمعروف وزارت په تېرو درې کلونو شاوخوا کې د (۵۰۰۰) زره مېرمنو میراث آخیستی او ورته یې تسلیم کړی، همدا راز په ټول هېواد کې د مېرمنو په بدو کې د ورکولو مخنیوی شوی چې د دې کار کچه اوس تقریبا صفر ته رسېدلې.

په پای کې ښاغلي حنفي صاحب له ټولو راغلو مېلمنو څخه وغوښتل چې نړۍ والو ته د اسلامي امارت رښتینی انځور وړاندې کړي او هر وخت د خپلو نېکو مشورو شریکولو په موخه راشي او په ګډه د ستونزو د حل لپاره د اسلامي امارت له مسؤولینو سره مرسته وکړي؛ چې د راغلو مېلمنو له لوري ورته د بشپړې همکارۍ ډاډ ورکړل شو او زیاته یې کړه،  اماده دي چې په مختلفو برخو کې خپلو هېواد والو ته خدمات او نړۍ ته د اسلامي امارت خصوصاً د امر بالمعروف وزارت رښتینی انځور وړاندې کړي