محمد عالم ناصح؛ د مشرتابه ټول فرمانو تر هرچا وړاندې باید پر ځان عملي کړو
د میدان وردګ ولایت د امربالمعروف رئیس مولوي محمد عالم ناصح تېره شپه د دې ولایت امنیه قومندانۍ کې د قرآن کریم تر ختم وروسته د مجاهدینو غوڼډې ته وویل: "د مشرتابه ټول فرمانونه باید تر چا وړاندې لومړی پر ځانونو عملي کړو."
په دغه غونډه کې د یاد ولایت مرستیال والي شېخ شېر احمد حقاني، امنیه قومندان محمد شریف حلیمي، د بېلابېلو دولتي ادارو مشرانو او ګڼ شمېر مجاهدینو ګډون کړی و.
ښاغلي ناصح همدارنګه وویل: مجاهدین باید ځانونه پر نبوي تګلاره برابره کړي او ټینګار یې وکړ چې هڅه وکړئ ټولنې او خلکو ته خیر ورسوئ.
نوموړي همدارنګه پر مجاهدینو غږ وکړ چې په خپلو لیکو کې کم عمره کسان داخل نه کړي، پر موټرونو او څلور لارو کې د مشرانو د انځورونو له ټینګولو ډډه وکړي.
دغه راز د غونډې په پای کې د میدان وردګ امنیه قومندان شېخ محمد شریف حلیمي وویل: مجاهدین باید د دې نظام د راتګ په حاکمېدو د لوی رب شکر ادا کړي او پر هغوی غږ وکړ چې د چوکۍ په هوس د شهیدانو ارمانونه هېر نه کړي.
