د امر بالمعروف، نهی عن المنکر او شکایتونو اورېدلو وزارت په اونۍ کې
د امر بالمعروف، نهی عن المنکر او شکایتونو اورېدو وزارت مسؤلینو د هېواد په کچه د اسلامي ارزښتونو د پالنې، مېرمنو د حقونو خوندیتوب، د قومي او ژبني دښمنیو د حل، ټولنیز عدالت د ټینګښت او د ټولنیز اخلاقي سمون لپاره د ټاکل شوې پالیسي پر اساس کړنې تر سره کړې دې.
د امر بالمعروف وزارت له لوري له محتسبینو سره د قانون د لا ښه تطبیق په موخه ناسته:
د امربالمعروف، نهی عن المنکر او شکایتونو اورېدلو وزارت له لوري د پلازمېنې کابل ولایت ټولو محتسبینو سره د دې وزارت د غونډو په تالار کې د قانون د اورولو او په ټولنه کې د لا ښه تطبیق په موخه ناسته وشوه.
د مېرمنو حقونو ته رسېدنه:
دغه راز محتسبینو په دې اونۍ کې د مېرمنو د حقونو اړوند (۷۸) بېلابېلې قضیې حل کړې دي، چې د یادې شمېرې له مخې (۳۱) د کورني تاوتریخوالي، (۱۲) د میراث، (۶) د غیر شرعي نکاح ګانو،(۹) د ولور، (۸) د نفقې ورکړې، (۵) مېرمنو ته شرعي نکاح زمینه برابره شوه او د (۷) مېرمنو د طلاق قضیې حل شوې دې.
د قومي دښمنیو حل:
محتسبینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په کچه (۹) دښمنۍ او (۴۰) وړې شخړې حل کړې دي.
د کوډګرو نیول:
د یاد وزارت مسؤلینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه (۶) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دي.
له سوداګرو سره ناستې:
او وروستی خبر دا، چې محتسبینو په بازارونو کې د سود، احتکار، ترازو کې د کموالي، د تاریخ تېره او بې کیفیته موادو د خرڅلاو د مخنیوي په موخه له سوداګرو او هټۍوالو سره (۱۷۷) اصلاحي ناستې کړې دې.
