محتسبینو په بلخ، تخار، بغلان، او جوزجان ولایتونو کې اته مېرمنې له بېلا بېلو ظلمونو څخه وژغورلې
د امر بالمعروف، نهې عن المنکر او شکایتونو اورېدلو وزارت محتسبینو په بلخ، تخار، بغلان او جوزجان ولایتونو کې د مېرمنو د حقونو ورکړې او په دې برخه کې د ناوړه کړنو د مخنیوي په موخه ۸ مېرمنې، چې د ناوړه دودونو پر اساس ځورول کېدلې له کورني تاوتریخوالي څخه وژغورلې.
د محتسبینو په وینا: یادې مېرمنې چې له تېرو څو کلونو راهیسې د خپلو کورنیو له لوري د فزیکي او رواني تاوتریخوالي سره مخ وې او د خسر ګنیو له لوري ورسره د بې معنا غیرتونو له امله ناوړه چلند کېده، د محتسبینو په هڅو وژغورل شوې.
محنسبین زیاتوي، چې د امیر المؤمنین حفظه الله له حکم سره سم به په پوره توان هڅه کوي، چې د مېرمنو پر وړاندې د تاوتریخوالي ډکو پېښو د کمولو په برخه کې هڅې وکړي او څوک به پرېنږدي چې د مېرمنو حقوق تر پښو لاندې کړي.
د یادولو وړ ده، چې د یاد وزارت محتسبینو په تېره قوس میاشت کې د هېواد په کچه، د مېرمنو حقونو ته د رسېدنې په برخه کې له سلګونه بېلا بېلو قضیو ته رسېدنه کړې، چې پکې د میراث، کورني تاوتریخوالي، ولور، په بدو کې ورکړې او غیر شرعي نکاح ګانو قضیې حل شوې دې.
