غزني ولایت کې د محتسبینو په هڅو یوه مېرمن له ځان وژنې څخه وژغورل شوه
د غزني ولایت د امربالمعروف، نهی عن المنکر او شکایتونو اورېدلو ریاست اړوند مقر ولسوالۍ د محتسبینو له لوري یوه مېرمن له ځان وژنې څخه وژغورل شوه.
په دې تړاو د یاد ولایت د امربالمعروف یاست مسؤلین وایي: یاده مظلومه مېرمن، چې د مقر ولسوالۍ د نوراخېلو د کلي اوسېدونکې وه، چې د خپل خاوند له لوري له سختو فزیکي او روحي زورونو سره مخ وه او غوښتل یې چې ځان وژنه وکړي د محتسبینو له لوري وژغورل شوه.
محتسبین زیاتوي: د مېرمنو پر وړاندې تاوتریخوالی، د هغوی د حقونو لکه میراث، مهر، د خاوند له لوري د نفقې نه ورکړه او له هغوی سره هر ډول ناوړه چلند تر سره کول د اسلام په مبارک دین کې ناروا بلل شوي دي، هېڅ چاته به اجازه ور نه کړي چې د مېرمنو شرعي حقونه تر پښو لاندې کړي.
دا په داسې حال کې ده چې د امربالمعروف، نهې عن المنکر او شکایتونو اورېدلو وزارت محتسبینو د هېواد په ټولو ولایتونو کې سل ګونه مېرمنې له کورني تاوتریخوالي ژغورلې دي او په دې پار یې کړنې لا هم دوام لري.
