په خوست او کنړ ولایتونو کې محتسبینو (۳) مېرمنې له کورني تاوتریخوالي څخه وژغورلې
د امربالمعروف، نهې عن المنکر او شکایتونو اورېدلو وزارت اړوند د کنړ او خوست ولایتونو محتسبینو د مېرمنو حقونو ته په ژمنیتا او پر وړاندې یې د تاوتریخوالي ډکو پېښو د مخنیوي په موخه (۳) مېرمنې له کورني تاوتریخوالي څخه وژغورلې او د یادو مېرمنو د کورنیو له غړو یې وغوښتل، چې په راتلونکي کې د داسې کړنو له تر سره کولو ډډه وکړي .
یادې مېرمنې، چې له تېرو څو کلنو راهیسې د بې معنی غیرتونو او ناوړه دودنو پر اساس زورول کېدلې او له جدي کورني تاوتریخوالي سره مخ وې، د یادو ولایتونو د محتسبینو له لوري وژغورل شوې.
د امربالمعروف، نهې عن المنکر او شکایتونو اورېدلو وزارت محتسبین ډاډ څرګندوي چې په پوره توان به د مېرمنو له شرعي حقونو څخه دفاع کوي او د هغو ټولو ناسمو دودونو مخه به نیسي چې له امله یې د مېرمنو شرعي حقوق له ګواښ سره مخ وي او هیڅ چاته به اجازه ور نکړي چې د مېرمنو پر وړاندې له تاوتریخوالي ډک چلند څخه کار واخلي.
دا په داسې حال کې ده، چې د امربالمعروف، نهې عن المنکر او شکایتونو اورېدلو وزارت محتسبینو د هېواد په ټولو ولایتونو کې په تېر یوه کال کې نیږدې(۳۲۶۱) مېرمنې له کورني تاوترخوالي او ورته ناوړه پېښو څخه ژغورلې دي.
