د امر بالمعروف، نهې عنالمنکر او د شکایتونو اورېدلو وزارت سرپرست وزیر د غزني ولایت له ځایي مسؤولینو او علماوو سره وکتل
د امر بالمعروف، نهې عنالمنکر او د شکایتونو اورېدلو وزارت سرپرست وزیر شیخ محمد خالد الحنفي صاحب د امیر المؤمنین حفظه الله د فرمانونو، حکمونو او لارښوونو ترڅنګ د امر بالمعروف او نهې عنالمنکر قانون د لا ښه پلي کېدو، د معروفاتو اقامې او منکراتو له منځه وړلو، عامه پوهاوي او همغږۍ په موخه غزني ولایت ته سفر وکړ او هلته یې د یاد ولایت له ملکي او نظامي مسؤولینو، دیني عالمانو، خطیبانو، قومي مشرانو او ګذر وکیلانو سره وکتل.
د امر بالمعروف، نهې عنالمنکر او د شکایتونو اورېدلو وزارت سرپرست وزیر شیخ محمد خالد الحنفي صاحب په خپلو خبرو کې وویل: د امر بالمعروف او نهې عنالمنکر قانون بشپړ شرعي قانون دی او د قرآن کریم، احادیثو او حنفي فقهې څخه را اخیستل شوی دی او زیاته یې کړه چې ټول مسؤولین، دیني عالمان او قومي مشران دې سره یو شي او د دښمن فکري یرغل او تبلیغاتو پر وړاندې دې مبارزې وکړي.
نوموړي همدارنګه ډاډ ورکړ چې د هېوادوالو ستونزو اورېدلو او هغوی ته پر وخت رسېدنې لپاره (۱۹۱) وړیا شمېره په چوپړ کې ده او ټول امارتي مسؤولین شرعي مکلفیت لري ترڅو د ولس ستونزې واوري او خدمت یې وکړي.
همداراز ښاغلي الحنفي صاحب له ټولو ګډونوالو وغوښتل ترڅو د ټولنې سمون، مثبت فکري بدلون، د منکراتو مخنیوي او د معروفاتو په دودولو کې برخه واخلي.
ورته مهال ځایي مسؤولینو، دیني عالمانو او قومي مشرانو د امر بالمعروف او نهې عنالمنکر قانون څخه د ملاتړ او هرکلي ترڅنګ په ټولنه کې د اصلاح راوستلو لپاره د یاد قانون پلي کېدل ګټور وبلل او زیاته یې کړه چې د امر بالمعروف او نهې عنالمنکر قانون او د امیر المؤمنین حفظه الله له لوري د ټولو صادر شویو فرمانونو، حکمونو او لارښوونو پلي کولو او تر نورو رسولو ته ژمن دي.
هېره دې نه وي چې ښاغلي وزیر صاحب د یوې جلا ليدنې په ترڅ کې د یاد ولایت مرکز او ولسوالیو محتسبینو سره ولیدل او هغوی ته یې د چارو ښه مخته وړلو په موخه اړینې لارښوونې وکړې او ترې ویې وغوښتل ترڅو د امر بالمعروف او نهې عنالمنکر قانون بشپړ پلي کولو ته ژمن پاتې شي او په رڼا کې یې خپلې چارې مخته یوسي.
