د امر بالمعروف، نهې عنالمنکر او شکایتونو اورېدلو وزارت سرپرست وزیر د افغانستان نهه شمالي ولایتونو ته سفر وکړ
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د هېواد شمالي ولایتونو ته د امیر المؤمنین حفظه الله د فرمانونو، حکمونو او لارښوونو د لا ښه پلي کېدو، عامه پوهاوي او د خلکو د ستونزو اورېدو په موخه د یو رسمي سفر په ترڅ کې بدخشان، تخار، کندوز، بغلان، سمنګان، بلخ، جوزجان، فاریاب او سرپل ولایتونو ته ولاړ او د یادو ولایتونو د ځایي مسؤولینو، علماء کرامو، خطیبانو، قومي مشرانو او ګذر وکیلانو سره یې وکتل.
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د یادو کتنو په ترڅ کې د شریعت پلي کول او حجاب د اسلامي نظام سرې کرښې وبللې او ډاډ یې ورکړ چې د امر بالمعروف، نهې عنالمنکر او شکایتونو اورېدلو وزارت د شریعت پلي کولو ته ژمن دی.
ښاغلي الحنفي صاحب همدا راز ډاډ ورکړ چې د اسلامي شریعت په چوکات کې د ښځو ټولو شرعي حقونو ورکړې ته ژمن دی او هېڅ څوک حق نلري ترڅو د ناوړه او غیر شرعي دودونو پر اساس د چا حق ورڅخه واخلي او یا خدای مکړه زور زیاتی ورسره وکړي.
نوموړي همداراز له علماوو، مسؤولینو او قومي مشرانو څخه وغوښتل ترڅو د اسلامي امارت مشرتابه ټولو فرمانونو، حکمونو او لارښوونو پلي کولو او تر نورو رسولو ترڅنګ د امر بالمعروف او نهې عنالمنکر برخه کې د یاد وزارت د محتسبینو سره همکاري او همغږي ولري.
ورته مهال د ټولو ولایتونو ځایي مسؤولینو، علماوو او قومي مشرانو د ښاغلي وزیر ورتګ سعادت او نېک پالي وبلله او ډاډ یې ورکړ چې د امیر المؤمنین حفظه الله فرمانونه، حکمونه او لارښوونې پلي کوي او تر نورو یې رسوي، نوموړو همدا راز امر بالمعروف او نهې عنالمنکر خپله وجيبه وبلله او ډاډ یې ورکړ چې په یاده برخه کې به د امربالمعروف وزارت سره بشپړه همکاري کوي.
هېره دې نه وي چې د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د عالیقدر امیر المؤمنین حفظه الله د فرمانونو، حکمونو او لارښوونو د لا ښه پلي کېدو په موخه ولایتي سفرونه ترسره کوي او هلته د ځایي مسؤولینو، علماوو او قومي مشرانو سره له نږدي ګوري.
