په ملت ترحم وکړئ، په بدو الفاظو څوک معروف ته مه رابولئ
پورتنی خبرې ننګرهار کې د ۷ ورځني سيمينار په وروستی ورځ شیخ امیرجان ثاقب صاحب محتسبینو ته وکړې او و یې ویل چې منصب باید یوه مرتبه و نه ګڼل شي، بلکې د خدمت ذریعه وګرځي.
هغه زیاته کړه چې داعي باید د خلکو لپاره رحمت وي، په ملت ترحم وکړئ په بدو الفاظو څوک نیکیو ته مه رابولئ.
د دې تر څنګ د سيمينار پرمخ بیوونکي شیخ محمد ثواب حقاني محتسبینو ته و ویل چې د منکر مخنیوي کې مو نیت باید سم وي، هدف دا نه وي چې د یو چا تذلیل وشي.
همدغه سمينار ته د اصلاح او تربیت رئیس مولوي محمدیحیا عارف و ویل چې د اسلامي نظام لب لباب او خلاصه امر بالمعروف او نهی عن المنکر دی او د ایمان کمال په امر بالمعروف او نهی عن المنکر سره راځي.
هغه محتسبینو ته په خطاب کې و ویل چې تاسو د ا.ا او اسلامي نظام ترجمانان یاست، خپلو کړنو ته مو فکر کوئ، هغه ډول دعوت کوئ چې قران او حدیث وایي.
عارف و ویل، شهیدانو قرباني ورکړه، تاسو ته یې ازادي په خپلو وینو راوستله، خو د اسلامي نظام قیام یې تاسو ته وسپاره.
نوموړي وړاندې و ویل د ملت له تیرو څلويښتو کلونو راهیسې وکړېده، تاسو یې باید و نه کړوئ، د دعوت طریقه مو باید په ډیره سمه توګه وي، خو د ملت ارمان مو هم هیر نشي، چې اسلامي نظام دی.
د اصلاح او تربیت رئیس و ویل د یو منکر مخنیوي کې که زور کاروئ، په داسې توګه ونشي چې له دغې منعې فساد رامنځته شي، داسې طریقه وکاروئ چې د خلکو په زړونو کې ځای پیدا کړئ.
نوموړي په پای کې مسئوليتونه ته په خطاب کې و ویل چې د مشرتابه د امر سره سم د خلکو په وړاندې یې دروازې باید خلاصې وي،رسمي وخت کې د خپلو ملګرو پرځای باید خلکو ته وخت ورکړي، کنه وي د الله د رحمت دروازې به درباندې وتړل شي او بیا به مو دعا هم نه قبلیږي.
د یادونې وړ دی چې په تول هیواد کې د امر بالمعروف او نهی عن المنکر محتسبینو ته سيمينارونه په لار اچول شوي چې پیل یې له ننګرهار څخه وشو او تر دې وروسته به همداسې دغه پروګرام په جریان کې وي.
