د امر بالمعروف وزارت رهبري د اطلاعاتو او کلتور وزارت له مرستیال او یو شمېر سیاحتي شرکتونو مسؤولینو سره وکتل
د امر بالمعروف، نهي عن المنکر او شکایتونو اورېدلو وزارت قدرمن وزیر شیخ الحدیث محمد خالد الحنفي په خپل کاري دفتر کې د اطلاعاتو او کلتور وزارت له مالي، اداري او ګرځندوی مرستیال مولوي قدرت الله جمال او د یو شمېر سیاحتي شرکتونو له مسؤولینو سره وکتل.
ناسته کې د امر بالمعروف، نهي عنالمنکر او شکایتونو اورېدلو وزارت قدرمن وزیر شیخ الحدیث محمد خالد الحنفي په خپلو خبرو کې، سیاحت د هېواد یو مهم سکتور وباله او ویې ویل، چې د اسلامي اصولو په چوکاټ کې د یاد سکتور ودې او پراختیا په برخه کې هر راز همکاري ته چمتو دی.
ښاغلي شیخ صاحب زیاته کړه، چی په سیاحتي سیمو کې د منکراتو مخنیوی، د ټولنیزو او اسلامي ارزښتونو ساتنه او د سالم چاپېریال رامنځته کولو ته ژمن دی او په دې برخه کې باید ټول ادارات ګډه همغږي ولري.
ورپسې د اطلاعاتو او کلتور وزارت مالي، اداري او ګرځندوی مرستیال مولوي قدرت الله جمال په خپلو خبرو کې د هېواد په سیاحتي سیمو کې د اسلامي ارزښتونو د خوندي ساتنې، د منکراتو د مخنیوي او د سیاحت د معیاري کولو په اړه مفصلې خبرې وکړې او ټینګار یې وکړ د اطلاعاتو او کلتور وزارت ژمن دی، څو سیاحتي سیمې داسې تنظیم او مدیریت کړي، څو د هېواد کلتوري او دیني ارزښتونه پکې مراعات شي او سیلانیانو ته هم مناسب او خوندي چاپېریال برابر شي.
ښاغلي جمال په دې برخه کې د سیاحتي شرکتونو د همکاري په اړتیا ټینګار وکړ او زیاته یې کړه، چې سیاحتي شرکتونه هم باید خپل فعالیتونه د هېواد له قوانینو او اصولو سره سم تنظیم کړي.
په ناسته کې همداراز د سیاحتي شرکتونو مسؤولینو هم خبرې وکړې او ډاډ یې ورکړ چې د اسلامي اصولو او لارښوونو په رڼا کې به خپل خدمات لا معیاري کوي او سیلانیانو ته به اړينې اسانتیاوې برابروي.
