د امر بالمعروف نهی عن المنکر او شکایتونو اوریدلو وزارت رهبري د نورستان ولایت یو شمېر قومي مشرانو سره وکتل

د امر بالمعروف، نهې عن‌المنکر او شکایتونو اورېدلو وزارت قدرمن وزیر شیخ الحدیث محمد خالد الحنفي په خپل کاري دفتر کې د نورستان ولایت له والي او د یاد ولایت له یو شمېر قومي مشرانو سره وکتل.

ناسته کې یادو قومي مشرانو د واورې او ځينو نورو ستونزو له امله د نورستان ولایت د لارو د بندښت او د خپلو سیمو اړوند  یو شمېر نورې ستونزې شريکې کړې.

قومي مشرانو د وزارت له رهبري څخه وغوښتل ترڅو د نورستان ولایت د لارو او سړکونو د ستونزو په اړه اړوند ادارو څخه غوښتنه وکړل شي ترڅو دغه ستونزو ته پر وخت او ښه توګه رسیدګې وکړي.

هغوی روښانه کړه، چې د نورستان ولسونه د خپل نظام ترڅنګ ولاړ دي او د اسلامي نظام ساتنې او پایښت لپاره به له هېڅ راز هڅو ډډه نکوي.

ورته مهال، د امربالمعروف نهی عن المنکر او شکایتونو اوریدلو وزارت قدرمن وزیر شیخ الحدیث محمد خالد الحنفي د یادو ستونزو د اورېدو ترڅنګ راغلي قومي مشرانو ته ډاډ ورکړ چې د وزارت رهبري به دا موضوعات له اړوندو مراجعو سره شریک کړي او د حل لپاره به لازمه همکاري ترسره کړي.

ښاغلي شیخ صاحب د یادو ستونزو د ژر حل په موخه د نورستان ولایت والي قاری زین العابدین هم یاد مجلس ته راغوښتی و او د خلګو ستونزی یې ورسره شریکي کړي. ښاغلي شيخ صاحب همداراز د نورستان والي ته سپارښتنه وکړه، چې څومره ژر کیږي د خلګو ستونزو ته دې رسیدګې وکړي او د مشکلاتو په حل کې دې بشپړ توان مصرف کړي.

همداراز راغلو قومي مشرانو ته شیخ الحدیث محمد خالد الحنفي ډاډ ورکړ، چې اسلامي امارت ته د خلکو ستونزو حلول او هغوی ته د لازمو اسانتیاوو برابرول لومړیتوب لري او هڅه کوي څو د خلکو ستونزو ته پر وخت حل رسېدنه وشي.

دا په داسې حال کې ده، چې د یاد وزارت رهبري له دې وړاندې هم د بېلابېلو سیمو له قومي مشرانو سره په لیدنو کې د هغوی ستونزې اورېدلي او د حل لپاره یې ګړندي ګامونه پورته کړي دي.