هلمند کې د محتسبینو له لوري د یوې مور په ګډون څلور واړه ماشومان د خاوند له ظلم څخه وژغورل شول
د هلمند ولایت د امر بالمعروف، نهی عن المنکر او شکایتونو اورېدلو ریاست له لوري د یوې مور په ګډون څلور واړه ماشومان پر نشه یي توکو د روږدي پلار له ظلم څخه ژغورل شوي او نوموړی تر نیول کېدلو وروسته د درملنې په موخه سیمیز روغتون ته ور پېژندل شوی دی.
په تړاو یې د یاد ولایت محتسبین وایي: یاده مېرمن، چې څلور واړه ماشومان هم لري چې د خاوند له لوري له دوامداره رواني او فزیکي ځورونې سره مخ وه د محتسبینو له لوري وژغورل شوه او د یادې مېرمنې خاوند د درملنې په موخه سیمیز روغتون ته ور وپېژندل شو.
محتسبین زیاتوي چې له یادې مېرمنې سره د نغدي مرستې تر څنګ د کور د لومړنیو توکو مرسته هم وشوه او پر داخلي همکارو مؤسیسو یې غږ وکړ چې د یادې مېرمنې په ژغورلو او د ارام ژوند په برابرولو کې همکاري وکړي.
بلخوا یادې مېرمنې د محتسبینو له همکارۍ د مننې تر څنګ وویل چې د خاوند له لوري له فزیکي ځورونې سره مخ وه او د خاوند د نشه یي توکو د پیدا کولو لپاره اړ ایستنل کېدله چې سوال وکړي او هغه هیله لري، چې خاوند یې له درملنې وروسته روغ رمټ کور ته راستون شي.
