د امر بالمعروف وزارت له لوري د ټولو ولایتونو د امر بالمعروف له رئیسانو سره د قانون د تنفیذ په موخه ناسته وشوه
د امر بالمعروف، نهی عن المنکر او شکایتونو اورېدلو وزارت د رهبرۍ له لوري د ټولو ولایتونو د امر بالمعروف له رئیسانو سره د امر بالمعروف وزارت د قانون د تطبیق، معروفاتو اقامې، منکراتو مخنیوي، ټولنیزو ستونزو د حل، اسلامي ارزښتونود پیاوړي کولو او په اړوندو برخو کې د قوانینو د عملي پلي کولو په موخه اصلاحي ناسته وشوه.
د ناستې د پیل په خبرو کې د امر بالمعروف، نهی عن المنکر او شکایتونو اورېدلو وزارت وزیر، شیخ الحدیث محمد خالد الحنفي د ناستې ګډون والو ته د ښه راغلاست تر څنګ په ټولنه کې د معروفاتو اقامې،منکراتو مخنیوي او د دعوت پر لارو چارو خبرې وکړې او ټینګار یې وکړ، چې له ولسي خلکو سره له نرم او غوره چلند څخه کار واخلئ او شته ستونزو ته یې پر وخت رسېدنه وکړئ.
دغه راز شیخ صاحب په خبرو کې وویل: د امر بالمعروف، نهی عن المنکر او شکایتونو اورېدلو وزارت قانون یو جامع او حنفي فقهې په اساس جوړ شوی قانون دی، چې پلي کول یې زموږ او ستاسې شرعی مسؤلیت دی.
ورته مهال ناستې ته راغلیو ولایتي مسؤلینو هم د یاد قانون پلي کول خپل شرعي مسؤلیت یاد کړ او ډاډ یې څرګند کړ، چې د قانون له توشېح کېدو وروسته په ټولنه کې د ډېرو منکراتو مخه نیول شوې او په دې پار به یې کړنې لا هم دوام ولري.
