د هېواد په (۸) ولایتونو کې محتسبینو له دیني عالمانو او قومي مخورو سره د ناوړه دودونو د مخنیوي او همغږۍ په موخه ناستې وکړې
د امر بالمعروف، نهی عن المنکر او شکایتونو اورېدلو وزارت اړوند د غزني، لوګر، پکتیا، پکتیکا، ننګرهار، هلمند، روزګان او لغمان ولایتونو کې محتسبینو د دې ولایتونو له دیني عالمانو، قومي مخورو او ځوانانو سره په ټولنه کې د ناوړه دودونو د مخنیوي، اسلامي ارزښتونو د ساتنې او د امیر المؤمنین حفظه الله د فرامینو د تطبیق په موخه ناستې و کړې.
د همغږۍ په موخه جوړو شویو ناستو ته په خبرو کې د امر بالمعروف مسؤلینو د علماوو، قومي مخورو او ځوانانو رول د ټولنې د اصلاح، د شریعت د تطبیق، او قوانینو د تنفیذ په برخه کې حیاتي وباله او له دیني عالمانو یې وغوښتل، چې په ټولنه کې د ناوړه دودونو د مخنیوي او عامه پوهاوي په برخه کې دې له بېلابېلو لارو د عامه ذهنیت د سمون لپاره کار وکړي.
دغه راز دیني عالمانو، قومي مخورو او ځوانانو د منکراتو د له منځه وړلو، د ښځو سره د تاوتریخوالي د مخنیوي، او په ټولنه کې د دیني ارزښتونو د پیاوړتیا په برخه کې خپلې خبرې وکړې او ټینګار یې وکړ چې د اسلامي ټولنې د سالمې ودې لپاره به په ګډه کار کوي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت ولایتي مسؤلینو تر دې وړاندې هم له دیني عالمانو، قومي مخورو، او ځوانانو سره په ټولنه کې د بدو او ناوړه پېښو د مخنیوي په موخه ناستې کړې دي.
