ننګرهار کې محتسبینو د (۱۱) کلیو له دیني عالمانو او قومي مخورو سره د ناوړه دودونو د مخنیوي په موخه ناسته وکړه
د ننګرهار ولایت د امر بالمعروف ریاست مسؤلینو د مرګز په ګډون د (۱۱) کلیو له دیني عالمانو، قومي مخورو او ځوانانو سره په ټولنه کې د ناوړه دودونو د مخنیوي، اسلامي ارزښتونو د ساتنې او د امیر المؤمنین حفظه الله د فرامینو د تطبیق په موخه ناسته و کړه.
ناستې ته په خبرو کې د یاد ولایت د امر بالمعروف مسؤلینو د علماوو، قومي مخورو او ځوانانو ونډه د ټولنې د اصلاح، د شریعت د تطبیق، او قوانینو د تنفیذ په برخه کې اړینه وبلله او له هغوی یې وغوښتل چې په ټولنه کې د ټولو منکراتو په مخنیوي او د معروفاتو په اقامه کې له محتسبینو سره مرسته وکړي.
دغه راز ناستې ته دیني عالمانو، قومي مخورو او ځوانانو د منکراتو د له منځه وړلو، د ښځو سره د تاوتریخوالي د مخنیوي، او په ټولنه کې د دیني ارزښتونو د پیاوړتیا په برخه کې خپلې خبرې وکړې او ټینګار یې وکړ چې د اسلامي ټولنې د سالمې ودې لپاره به په ګډه کار کوي.
د یادولو وړ ده، چې د ناستې ګډون والو په دې ولایت کې د محتسبینو کړنې وستایلې او ژمنه یې وکړه چې د شرعي قوانینو په پلي کولو او د منکراتو په مخنیوي کې د محتسبینو تر څنګ ولاړ دي.
