په پکتیکا کې محتسبینو یوه مېرمن له اوږد مهاله کورني ظلم څخه وژغورله
د پکتیکا ولایت د امر بالمعروف، نهی عن المنکر او شکایتونو اورېدلو ریاست اړوند د وړ ممۍ ولسوالۍ مسؤلینو یوه مېرمن، چې له اوږدې مودې راهیسې د خپل خاوند له لوري په فزیکي او رواني ډول ځورول کېدله او له ټولو شرعي حقونو څخه بې برخې وه د محتسبینو په هڅو وژغورل شوه.
مسؤلین وایی: یاده مېرمن، چې د خپل خاوند له لوري له رواني او فزیکي ځورونې سره مخ وه او له خپلو ټولو شرعي حقونو څخه بې برخې وه وروسته له هغه یې مخه ونیول شوه چې یاده مېرمن د خپلو شرعي حقونو د غوښتنې په موخه د یادې ولسوالۍ محتسبینو ته د قضیې د حل په موخه عارضه شوه.
دغه راز د یادې ولسوالۍ محتسبینو د نوموړې مېرمنې خاوند ته د اسلام په مبارک دین کې د ښځو پر ارزښت او د هغوی د حقونو په تړاو خبرې وکړې او له هغه یې ژمنه واخیسته چې په راتلونکي کې به داسې غیر شرعي کړنې نه تر سره کوي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت مسؤلینو په ټول هېواد کې یې تر ډېره حده د مېرمنو پر وړاندې د تاوتریخوالي ډکو پېښو مخه نیولې او پر مېرمنو د ناوړه دودیزو دودونو کچه یې د پخوا په پرتله را کمه کړې ده، چې پر اساس یې مېرمنې کولی شي په ازاد ډول د خپلو شرعي حقونو غوښتنه وکړي.
